Президент Қасым-Жомарт Тоқаев медицина қызметкерлерін қорғайтын заңнамаға толықтырулар енгізді. Енді дәрігерлер мен жедел жәрдем жүргізушілеріне шабуыл жасағандар қылмыстық жауапкершілікке тартылады.
Ведомство мәліметінше, жаңа норма олардың қызметтік міндетін атқару кезінде жасалған күш қолдануды аса ауыр қылмыс ретінде қарастырады. Бұған дейін мұндай әрекеттер тек бұзақылық ретінде бағаланатын.
Бұл туралы Zhaiyqmedia.kz ақпарат агенттігі хабарлайды.
Мәжіліс депутаты Асхат Аймағамбетовтің айтуынша, заңдағы бұл өзгерістер тек медицина мамандарына ғана емес, бүкіл қоғамға қажет. Оның пікірінше, тиісті қорғау болмаса, тәжірибелі дәрігерлер қауіпсіздігіне алаңдап, мамандықтарынан бас тартуы мүмкін.
«Егер дәрігер соғылмаған, саусақтары сынбаған болса – ота жасауын жалғастыра береді. Бұл инфаркт алған әжеге немесе талмасы бар балаға дер кезінде көмек жетеді деген сөз», – дейді депутат.
Медқызметкерлерді қорғау не үшін маңызды?
Аймағамбетов шабуыл – бұл жай ғана жанжал емес екенін атап өтті. Ол – емделуге кететін уақытты кешіктіру, дұрыс диагноз қоймау, тіпті адам өмірінен айырылу қаупі.
«Қорғалған дәрігер – құтқарылған пациент. Бұл – бұлтартпас ақиқат», – деп қорытты ол.
Сенат бұл заң жобасын 2025 жылдың желтоқсанында мақұлдаған болатын. Қылмыстық кодекске жаңа 380-3-бап енгізілді. Ол медицина қызметкеріне және жедел жәрдем жүргізушісіне қатысты күш көрсеткендерді қатаң жазалауды көздейді.
Соңғы 5 жылда 175 шабуыл тіркелген
Ресми мәліметке сәйкес, соңғы бес жылда Қазақстанда медицина қызметкерлеріне жасалған 175-тен аса шабуыл тіркелген. Сарапшылар мұндай оқиғалар саны артып жатқанын айтады.
Енді жаңа заң аясында мұндай әрекеттердің салдары ауырлайтыны белгілі болмақ, бұл өз кезегінде медицина саласы мамандарына сенімділік беріп, халыққа сапалы әрі дер кезінде көмек көрсетуге мүмкіндік ашады.
