Сурет: МЭКС
«Қазақстан Тұрғын үй Компаниясы» АҚ «Энергетикалық және коммуналдық секторларды жаңғырту» ұлттық жобасы аясында алты өңір әкімдіктерінің облигацияларын 27,3 млрд теңгеге сатып алды, деп хабарлайды Zhaiyqmedia.kz ақпарат агенттігі.
Қаражат Шығыс Қазақстан, Жамбыл, Жетісу, Батыс Қазақстан, Қарағанды және Қостанай облыстарындағы жобаларға бағытталады. Ол сумен жабдықтау, су бұру және жылумен жабдықтау жүйелерін реконструкциялауға, сондай-ақ коммуналдық инфрақұрылымға цифрлық шешімдер енгізуге жұмсалады.
Шығыс Қазақстан облысында Өскеменде тозуы 59%-дан асатын су құбыры желілері жаңартылады. Жамбыл облысында Тараз қаласының су құбыры мен жылу желілері қайта жаңғыртылады, мұнда су құбырының бір бөлігі 60 жылдан астам пайдаланылып, кейбір учаскелердің тозуы 95%-ға жетеді. Жетісу облысында жылу, су құбыры және кәріз желілерін жаңғырту, сондай-ақ сумен жабдықтау және су бұру нысандарын автоматтандыру бойынша жеті жоба іске асырылуда. Батыс Қазақстан облысында Ақсайда кәріз желілері жаңартылады, онда инфрақұрылымның орташа тозуы 79%-дан асады. Қарағанды облысында «Қарағанды Су» ЖШС-нің су тазарту кешені жаңғыртылады. Қостанай облысында жылу желілері жаңартылып, Рудный, Лисаков және Жітіқара қалаларында энергия ресурстарын есептеудің автоматтандырылған жүйелері енгізіледі.
Жобаларды іске асыру коммуналдық инфрақұрылымның тозуын төмендетуге, жылумен және сумен жабдықтаудың сенімділігін арттыруға, ресурстарды жоғалтуды қысқартуға және коммуналдық қызметтердің сапасын жақсартуға мүмкіндік береді. Тек Қарағанды облысында ғана 695 мыңнан астам тұрғын, Жетісу облысында 60 мыңнан астам адам сапалы сумен қамтамасыз етіледі, ал басқа өңірлерде жобалар ондаған мың тұтынушыға жағдайды жақсартады.
«Қазақстан Тұрғын үй Компаниясы» АҚ табиғи монополия субъектілерін мемлекеттік қатысуы бар кәсіпорындар үшін әкімдіктер облигацияларын сатып алу және жеке меншік табиғи монополия субъектілері үшін кредиттерді субсидиялау арқылы қаржыландырады. 2026 жылғы 26 маусымдағы жағдай бойынша компания 11 ЖАО-ның мемлекеттік бағалы қағаздарын 104,3 млрд теңге сомасына сатып алды.
