Сурет: Ашық дереккөз
Премьер-министр Олжас Бектенов үкімет отырысында Төтенше жағдайлар министрлігіне әкімдіктермен бірлесіп, 1 маусымға дейін барлық су айдындарын, жағажайлар мен бассейндерді тексеруді тапсырды. Бұл – жаз маусымына дайындық аясындағы қауіпсіздік шараларының бірі, деп хабарлайды Zhaiyqmedia.kz ақпарат агенттігі.
Бектеновтің айтуынша, биыл суға бату оқиғаларын азайту үшін алдын алу жұмыстарын күшейту қажет. Өткен жылы елімізде 400-ден астам адам суға кеткен, оның ішінде 70-ке жуық бала бар.
«Әрбір жағажайда құтқарушылар кезекшілік етуі керек. Бассейндер мен демалыс орындарында қауіпсіздік ережелерінің сақталуын қатаң бақылаңыздар», – деді Премьер-министр.
Үкімет басшысы сондай-ақ жергілікті әкімдіктерге рұқсатсыз жағажайларды жауып, халыққа қауіпсіз демалыс аймақтарын ұсынуды тапсырды. Тексеру нәтижелері бойынша 1 маусымға дейін есеп беру қажет.
