«Қыз Жібек» фильміндегі камзолдың тағдырына байланысты қоғамда қызу талқыланған даудан кейін Мәдениет және ақпарат министрлігі тарихи кинореквизиттерді бақылауды күшейту туралы шешім қабылдады, деп хабарлайды Zhaiyqmedia.kz ақпарат агенттігі.
Министрліктің мәліметінше, бұл шаралар кино саласындағы мәдени мұраны сақтау және оның заңсыз айналымын болдырмау мақсатында қолға алынып отыр. Ведомство реквизиттердің есебін жүргізу, сақтау және пайдалану тәртібін қатаңдатуды жоспарлап отыр.
«Біз тарихи кинореквизиттердің мемлекет меншігінде қалуын және олардың тиісті деңгейде сақталуын қамтамасыз етуіміз керек. Осы орайда заңнамалық өзгерістер мен бақылау шараларын күшейтеміз», — деді министрлік өкілі.
Еске сала кетейік, бұған дейін «Қыз Жібек» фильміндегі камзолдың жеке коллекцияға өтіп кетуі мүмкін деген ақпарат тараған болатын. Бұл жағдай қоғамда кеңінен талқыланып, мәдени мұраны қорғау мәселесін көтерді.
