Үкімет отырысында авиация саласын дамыту мәселелері қаралды. Соңғы үш жылда БҚО-да жолаушылар ағыны 43%-ға, ұшып-қону жиілігі 24%-ға артты.
Қазір Мәншүк Мәметова атындағы Орал халықаралық әуежайынан 5 республикалық және 2 халықаралық тұрақты бағытқа рейстер орындалады. Маусымдық Анталья мен Шарм-эль-Шейх бағыттарынан бөлек, алдағы айда Стамбул–Орал–Стамбул жаңа тұрақты рейсі ашылады. Сондай-ақ Атырау, Қарағанды және Мәскеу бағыттарын іске қосу мүмкіндігі қарастырылуда.
Әуежайда рульдеу жолағы мен перрон жөнделіп, қауіпсіздік және инженерлік жүйелер жаңартылды. Цифрландыру аясында рейстерді бақылау және IT-инфрақұрылымды мониторингтеу жүйелері енгізілді.
Облыс әкімі Нариман Төреғалиев шағын авиацияны дамыту және туристік әлеуеті жоғары Бөкей ордасы ауданына әуе қатынасын ұйымдастыру мәселесін пысықтауды тапсырды.
