Әлеуметтік желілерде облыстық маңызы бар «Қайыңды – Ақпәтер – Жалпақтал – Жұлдыз – Қарасу» автожолының 6–170 шақырым аралығында еріген қар суының жайылуы туралы ақпарат жарияланды. Аталған жол бөлігі Батыс Қазақстан облысының жолаушылар көлігі және автомобиль жолдары басқармасының теңгерімінде.
Қардың қарқынды еруі салдарынан жолдың төмен орналасқан тұстарында еріген судың жол үстіне жайылуы орын алды. Жағдайға жедел ден қойған тиісті мекемелер тарапынан қажетті шаралар қабылданды. Атап айтқанда, жолға қызмет көрсететін «SSS Stroy» жауапкершілігі шектеулі серіктестігі ауыр арнайы техниканың тәулік бойғы кезекшілігін ұйымдастырды. Сонымен қатар жергілікті атқарушы орган тарапынан да кезекшілік қамтамасыз етіліп, ахуал тұрақты бақылауға алынды. Қазіргі таңда автокөлік қозғалысы қалыпты режимде жүзеге асырылуда. Елді мекендерге су басу қаупі жоқ.
Аудан әкімі Асланбек Сарқұлов аталған аумақта «SSS Stroy» ЖШС директоры С.Сертековпен кездесіп, дегдіген жолды қыру, кезекшілік қоюды және жол бетіне жиналған суды жыру бағытында жұмыстарды жүргізуді тапсырды.
Казталов ауданы әкімдігінің баспасөз қызметі
