Беделді The Economist басылымы 2000 жылдан бері алтын қорын ең көп жинаған елдердің рейтингін жариялады, бұл тізімде Қазақстан да алдыңғы қатардан көрінді, деп хабарлайды Zhaiyqmedia ақпарат агенттігі.
Рейтингте Ресей көш бастап тұр. Сарапшылардың пікірінше, бұл ел долларға тәуелділікті азайтып, халықаралық санкциялардан қорғану үшін алтынды белсенді түрде жинаған.
Тізімдегі келесі орындарда Қытай мен Үндістан тұр. Бұл екі ірі мемлекет те валюталық резервтерін әртараптандыру мақсатында алтын үлесін едәуір арттырған.
Ал Түркия өз резервіндегі алтын үлесін 4%-дан 36%-ға дейін жеткізіп, айтарлықтай өсім көрсетті. Бұл қадам валюталық дағдарыстар кезінде ел экономикасын тұрақтандыруға көмектескені айтылады.
Бұл қатарда Қазақстан, Таиланд және Катар да бар. Аталған елдер алтынды инфляция мен валюталық тәуекелдерден сақтанудың тиімді құралы ретінде қарастырады.
Сонымен қатар, Венгрия да 2018 жылдан бастап қаржылық тұрақтылықты қамтамасыз ету үшін алтынды көптеп сатып ала бастаған.
Фото: Әлеуметтік желіден
