Сурет: Еuronews.com
Израильдің Нетания қаласы маңында мыңдаған еврей міндетті әскери қызметке қарсы наразылық акциясына шықты. Шеруге қатысушылар әскери қызметтен бас тартқаны үшін қамауға алынған азаматтарды босатуды талап етті, деп хабарлайды Zhaiyqmedia.kz ақпарат агенттігі.
Бейт-Лид әскери базасының алдында өткен наразылықты басу үшін оқиға орнына қауіпсіздік күштері мен су шашатын арнайы техника жұмылдырылды.
Наразылық Израильдің бірнеше бағыттағы әскери операциялары жалғасып жатқан кезеңде өтті. Осыған байланысты елде әскерге шақыру мәселесі қоғам мен билік үшін өзекті тақырыпқа айналып отыр.
Дауға діни оқу орындарында білім алып жүрген ультраортодоксалды студенттердің әскери қызметтен босатылып келуі басты себеп болып отыр. Бұл тәжірибе Израиль мемлекеті құрылған 1948 жылдан бері қолданылып келеді.
Ел билігінің мәліметінше, жыл сайын шамамен 13 мың дін жолындағы жас әскерге шақыру жасына жетеді. Алайда олардың шамамен 10 пайызы ғана әскери қызметке барады.
2017 жылы Израильдің Жоғарғы соты мұндай жеңілдіктерді заңсыз деп танығанымен, кейінгі билік жүйесі бұл тәртіпті сақтап қалды. Соңғы апталарда ультраортодоксалды партиялар да премьер-министр Биньямин Нетаньяху басқаратын коалицияны қолдаудан бас тартқан. Осылайша мәселе одан әрі шиеленісіп отыр.
Еске сала кетейік, бұған дейін Қорғаныс министрлігі күзге дейін 21 мыңнан астам азамат әскер қатарына шақырылатынын мәлімдеген болатын.
