Сурет: Getty Images
ФИФА футболшылардың мәртебесі мен трансферлеріне қатысты регламентке өзгерістер енгізуді мақұлдады. Жаңа ережелер 2027 жылдың 1 қаңтарынан бастап күшіне енеді және әлемдік футбол үшін революциялық өзгеріс болмақ, деп хабарлайды Zhaiyqmedia.kz ақпарат агенттігі.
Diario As басылымының мәліметінше, енді әрбір футболшының келісімшартында міндетті түрде өтемақы (клаусула) туралы тармақ болуы тиіс. Егер көрсетілген сома төленсе, қолданыстағы келісімшарт өз күшін жояды. Мұндай жүйе Испанияда қолданылады, бірақ басқа елдер оны енгізуге асықпаған.
Бұл қадам футболшылардың клубтар арасындағы ауысуын жеңілдетеді. Жылдық жалақысы 150 мың еуроға дейінгі ойыншылар клаусула сомасының немесе трансфер құнының 5 пайызы көлемінде өтемақы алуға құқылы болады. Егер трансфер сомасы клаусуладан өзгеше болса, өтемақы трансфер құны негізінде есептеледі.
Футболшылар бұл төлемнен ішінара бас тарта алады, бірақ өтемақы көлемі келісімшарттың соңғы жылындағы жалақы мөлшерінен немесе трансфер сомасының 2,5 пайызынан төмен болмауы тиіс.
ФИФА келісілген шешімдерді тек олардың заңнамалық нормаларға қайшы келетінін немесе шамадан тыс шығындарға алып келетінін дәлелдеген жағдайда ғана іске асырудан бас тарта алады.
