Сурет: Aikyn.kz
Қазақстанда ет бағасының көтерілуі тоқтамай тұр. Соңғы айда сиыр еті мен қой етінің құны айтарлықтай өсті, бұл халықтың әмиянына ауыр тиді, деп хабарлайды Zhaiyqmedia.kz ақпарат агенттігі.
Статистикаға сүйенсек, еттің кейбір түрлері 5-10 пайызға қымбаттаған. Сарапшылардың айтуынша, бұған мал азығының бағасының өсуі мен экспорттық сұраныстың артуы себеп болып отыр.
«Нарықтағы жағдай күрделі. Ет өндірушілер шығынды жабу үшін бағаны көтеруге мәжбүр. Бұл үрдіс алдағы айларда да сақталуы мүмкін», — дейді экономист Айдар Сәрсенбаев.
Қазақстан үкіметі бағаны тұрақтандыру үшін азық-түлік корпорациясы арқылы араласу жоспарын әзірлеп жатыр. Алайда мамандар бұл шаралардың қысқа мерзімді ғана нәтиже беретінін ескертеді.
