Сурет: Aikyn.kz
Кубаның Вице-Президенті Сальвадор Вальдес Меса Қазақстан Парламенті Мәжілісіне келді. Бұл сапардың басты мақсаты – екі ел арасындағы парламентаралық байланысты нығайту және әлеуметтік-экономикалық, мәдени-гуманитарлық салалардағы ынтымақтастықты тереңдету, деп хабарлайды Zhaiyqmedia.kz ақпарат агенттігі.
Мәжіліс төрағасы Ерлан Қошанов қонақты қарсы алып, Қазақстан мен Куба арасындағы достық қарым-қатынасқа тоқталды. Ол екі елдің парламенттері арасындағы диалогты дамыту маңызды екенін атап өтті.
«Біздің әріптестігіміздің әлеуеті зор. Әсіресе, сауда-экономика және мәдениет саласында бірлескен жобаларды жүзеге асыруға мүдделіміз», – деді Қошанов.
Куба вице-президенті өз кезегінде Қазақстанның халықаралық аренадағы рөлін жоғары бағалап, екіжақты байланысты жаңа деңгейге көтеруге ниетті екенін жеткізді. Тараптар білім, денсаулық сақтау және туризм саласында тәжірибе алмасуға келісті.
Бұл сапар Куба мен Қазақстан арасындағы дипломатиялық қатынастардың 30 жылдығы қарсаңында өтіп отыр. Кездесу соңында өзара түсіністік туралы меморандумға қол қою жоспарланған.
