Қазақстанда көлік аз жүретін ауыл жолдарына асфальт төсеу уақытша тоқтатылып, оның орнына қиыршық тас төселуі мүмкін. Көлік министрлігі осындай өзгеріс енгізуді көздейтін бұйрық жобасын жариялады, деп хабарлайды Zhaiyqmedia ақпарат агенттігі.
Ведомствоның түсіндіруінше, бұл шешімнің басты себебі – қаржы үнемдеу. Қазіргі таңда асфальт төсеу қиыршық тасқа қарағанда 6-10 есе қымбатқа түседі. Жергілікті бюджеттердің барлық жерге сапалы асфальт төсеп, оны жөндеп отыруға мүмкіндігі жете бермейді.
Осыған байланысты, министрлік төмендегідей жолдарға асфальт төсеуден уақытша бас тартуды ұсынып отыр:
- Тұрғын саны 500 адамнан аспайтын елді мекендердегі жолдар;
- Тәулігіне 500-ден аз көлік өтетін жолдар.
Алайда, бұл шектеу барлық нысанға қатысты емес. Мынадай маңызы бар жерлерге баратын жолдарға асфальт бұрынғыдай төселе береді:
- Мектептер мен ауруханаларға апаратын жолдар;
- Су, жарық, қауіпсіздік сияқты маңызды нысандарға баратын жолдар;
- Қалалар мен елдерді жалғайтын ірі тасжолдар;
- Жеке инвестиция есебінен салынып жатқан нысандарға апаратын жолдар.
Егер бұйрық жобасы қабылданса, ол ресми күшіне енген сәттен бастап 2027 жылдың 1 қаңтарына дейін әрекет етеді. Құжатты қоғамдық талқылау 5 наурызға дейін жалғасады.
Фото: Әлеуметтік желіден
