Технологиялық гигант Nvidia графикалық процессорлар нарығынан тыс, жаңа салаға бет бұрып, ауа райын болжауға арналған жасанды интеллект платформасын іске қосты, деп хабарлайды Zhaiyqmedia ақпарат агенттігі.
Компания Earth-2 деп аталатын жаңа ашық кодты платформасын таныстырды. Бұл жүйеде екі түрлі жасанды интеллект моделі бар: бірі алдағы 14 күнге арналған ұзақ мерзімді болжам жасаса, екіншісі таяу 6 сағат ішіндегі өзгерістерді аса жоғары дәлдікпен көрсетеді.
Nvidia өкілдерінің айтуынша, жаңа модельдердің дәлдігі мемлекеттік метеорологиялық қызметтер мен осы саладағы тағы бір ірі ойыншы Google DeepMind әзірлемелерімен бірдей деңгейде. Бұл компанияның климаттық технологиялар нарығына байыпты қадам жасағанын аңғартады.
Мұндай құрал ең алдымен бизнесі ауа райына тікелей тәуелді салалар үшін маңызды. Олардың қатарында энергетикалық трейдерлер, сақтандыру компаниялары, агроөнеркәсіп кешені және логистика саласының мамандары бар. Дәл болжамдар оларға тәуекелдерді азайтып, жұмысты тиімді жоспарлауға мүмкіндік береді.
Фото: Әлеуметтік желіден
