Қазақстан 2027 жылға дейін Каспий теңізі арқылы контейнер тасымалдауды ұлғайту мақсатында Әзербайжаннан екі кеме сатып алуды жоспарлап отыр. Бұл туралы Көлік министрі Нұрлан Сауранбаев мәлімдеді.
Министрдің айтуынша, қазіргі уақытта Каспий хабы аясында Ақтау және Құрық порттарын жаңғырту жұмыстары қарқынды жүргізілуде.
Ақтау портында қытайлық Ляньюньган компаниясымен бірлескен контейнерлік хаб құрылысының бірінші кезеңі жыл соңына дейін аяқталады. Жобаның толық іске қосылуы нәтижесінде хабтың жылдық өткізу қабілеті 240 мың контейнерге дейін жетеді. Сонымен қатар, порт акваториясын тереңдету және айлақтарды реконструкциялау жұмыстары да атқарылуда.
Құрық портында «Саржа» көпфункционалды терминалының құрылысы жалғасып жатыр. Бұл инфрақұрылымдық жобалар Каспий теңізі арқылы транзиттік ағынды арттыруға және өңірдің логистикалық әлеуетін күшейтуге бағытталған.
Нұрлан Сауранбаев Қазақстанның Әзербайжаннан сатып алуды жоспарлап отырған кемелерінің сыйымдылығы әрқайсысы 780 контейнерге дейін екенін атап өтті. Бұл қадам еліміздің халықаралық контейнерлік тасымалдау әлеуетін нығайтып, сауда ағындарын тиімді етуге мүмкіндік береді.
Министрдің сөзінше, жаңа кемелер мен порт инфрақұрылымын жаңғырту жобалары Каспий аймағындағы логистикалық байланыстарды дамытуға және транзиттік әлеуетті арттыруға елеулі үлес қосады.
