Ұлттық қауіпсіздік комитеті фармацевтика саласындағы ірі қылмыстық схеманы әшкереледі. «OrdaMed» АҚ шетелден әкелінген жабдықты «отандық өнім» ретінде көрсетіп, мемлекетке миллиардтаған теңге залал келтірген, деп хабарлайды Zhaiyqmedia ақпарат агенттігі.
Компания басшылығы Қазақстанда өз өндірісі бар екені туралы жалған құжаттарды пайдаланған. Осының арқасында олар халықтың денсаулығы үшін аса маңызды саналатын 28 түрлі медициналық жабдықты мемлекеттік емдеу мекемелеріне жеңілдетілген шартпен жеткізуге заңсыз мүмкіндік алған.
«Іс жүзінде дайын жабдықтар шетелден әкелініп отырған. Осы заңсыз әрекеттердің салдарынан мемлекетке 4,5 миллиард теңге көлемінде залал келтірілді», — деп хабарлады Ұлттық қауіпсіздік комитеті.
