Сурет: Egemen Qazaqstan
Қазақ ұлттық қыздар педагогикалық университетінің PhD докторы, аға оқытушы Айжан Қоңырованың жетекшілігімен студенттер тобы тарих сабақтарына арналған «TarikhMap» платформасын әзірледі. Бұл инновациялық жүйе интерактивті цифрлық карталар мен жасанды интеллект технологияларын қолдануға бағытталған, деп хабарлайды Zhaiyqmedia.kz ақпарат агенттігі.
Платформаның басты мақсаты – тарих пәнін оқытуды цифрландыру, оқушылардың қызығушылығын арттыру және мұғалімдердің уақытын тиімді пайдалануға мүмкіндік беру. Қазіргі уақытта университет студенттері педагогикалық практика кезінде бұл жүйені белсенді қолданып, жаңа тақырыптарды түсіндіруде, мемлекеттердің аумақтық өзгерістерін көрсетуде және тарихи оқиғаларды интерактивті форматта таныстыруда пайдалануда.
Цифрлық карталар оқу материалын бекітуге, үй тапсырмаларын тексеруге және жоғары сынып оқушыларын ҰБТ-ға даярлауға көмектеседі. «TarikhMap» «Startup-Tomiris» байқауында үздіктер қатарынан орын алып, 1 млн теңге грантқа ие болды. Қазір платформа Алматы қаласы мен облысындағы бірқатар мектептерге кезең-кезеңімен енгізілуде.
