Жыл соңына қарай қазақстандық әуе компанияларының ұшақтарында интернет қолжетімді болады, ал бұл жаңалықты алғашқылардың бірі болып жаңа Dreamliner 787 ұшағының жолаушылары сезінеді, деп хабарлайды Zhaiyqmedia ақпарат агенттігі.
Бұл туралы ҚР Көлік вице-министрі Талғат Ластаев мәлімдеді. Оның айтуынша, елімізге жақын арада келетін заманауи әуе кемелері бірінші кезекте жаңа қызмет түрімен жабдықталады.
Ведомство өкілі бұл жаңалықтың биыл жеткізілетін Dreamliner 787 үлгісіндегі ұшақтарға қатысты екенін атап өтті.
«Бұл – Dreamliner 787 үлгісіндегі әуе кемелері. Ең алдымен осы ұшақтарды борттағы интернетпен жабдықтау жоспарланып отыр. Қазір тиісті жұмыс жүргізіліп жатыр», — деді Талғат Ластаев.
Вице-министр қазіргі жоспарларға сәйкес, бұл қызметтің жақын арада іске қосылатынын жеткізді.
«Менің болжамымша, бұл – осы жылдың соңы мен келесі жылдың басы», — деді ол.
Ластаевтың сөзінше, жаңа ұшақтар ішкі және халықаралық рейстерді де орындайтын болады. «Дегенмен, бұл алыс магистральді ұшақ болғандықтан, негізінен халықаралық бағыттарда ұшады», — деп нақтылады вице-министр.
Фото: Әлеуметтік желіден
