Астанада «AMANAT» партиясының Кәсіпкерлер қанаты энергетиктермен кездесіп, саладағы өзекті мәселелерді талқылады. Бас қосуда тариф саясатын жетілдіру, кадр тапшылығы және желілердің тозуы сынды күрделі сұрақтар көтерілді.
Партия өкілдері энергия тарифтерін тұрақтандыру үшін нақты тетіктер әзірлеу қажеттігін айтады. Сондай-ақ салада білікті мамандардың жетіспейтіні, жастардың энергетикаға келмейтіні атап өтілді.
«Біз тарифтің негізсіз өсуіне жол бермейтін, әрі инвестиция тартуға мүмкіндік беретін теңгерімді шешім ұсынуымыз керек. Кадр мәселесін шешу үшін колледждер мен жоғары оқу орындарымен бірлесіп жұмыс істеу қажет», — деді Кәсіпкерлер қанатының төрағасы Тимур Нұғыманов.
Жиын қорытындысы бойынша партия энергетика саласын дамытуға бағытталған нақты ұсыныстар пакетін әзірлеп, оны үкіметке жолдамақ.
