UFC-дің бұрынғы чемпионы Хабиб Нұрмагомедов Ресейдегі барлық кәсібін тоқтатып, инвестициясын Біріккен Араб Әмірліктеріне ауыстырды, деп хабарлайды Zhaiyqmedia ақпарат агенттігі.
Спортшының бұл қадамы қоғамда қызу талқыланып, оған қатысты Ресей Мемлекеттік Думасының депутаты Ирина Роднина пікір білдірді. Ол Нұрмагомедовтың шешімінен ешқандай заң бұзушылық көріп отырмағанын атап өтті.
«Оның басқа елде бизнеспен айналысуға толық құқығы бар. Бұл жерде заңға қайшы ештеңе жоқ. Әркім өз қаражатын қалаған жеріне салуға ерікті», – деді Роднина.
Ашық дереккөздерге сәйкес, Хабиб Нұрмагомедовтың Біріккен Араб Әмірліктеріндегі жобаларынан түсетін жылдық табысы шамамен 46 миллион долларға жетуі мүмкін. Спорттық мансабын аяқтаған соң ол түрлі бизнес салаларына, соның ішінде IT, жылжымайтын мүлік және ауыл шаруашылығына белсенді инвестиция салып келеді.
Фото: Әлеуметтік желіден
