11 қыркүйек күні «Jastar» саябағында қала күніне арналған «Туған қалам – Оралым» атты мерекелік шара ұйымдастырылды. Мереке Круглоозерный кенті әкімдігінің қолдауымен және «Шұғыла» комьюнити орталығының бастамасымен өтті.
Салтанатты кеште Круглоозерный кентінің ақсақалдар алқасының төрағасы С.Кенжеғалиев, Мәдени-ағарту бірлестігінің директоры К.Ахметова және кент әкімі А.Неғметов жерлестерін төл мерекемен құттықтап, кенттің қоғамдық өміріне белсене араласқан ардагерлерге қала әкімінің атынан алғыс хаттар табыс етті.
Мерекелік бағдарламаның аясында қолөнершілердің туындыларынан көрме-жәрмеңке ұйымдастырылды. Сондай-ақ заманауи сән бұйымдарының шебері, «Жібек жолы» шапанының авторы, «Айкербез» ұлттық киім және қолөнер орталығының мүшесі Лия Анесова өзінің «Дала үні» топтамасын көпшілікке таныстырды.
Кеш соңында жас өнерпаздар, жетекшілер мен арнайы шақырылған қонақтар өнер көрсетіп, мерекелік көңіл-күй сыйлады.
Барша оралдықтар қала күні мерекесін ерекше шаттықпен атап өтті.
