Отандық филологтар жалпыхалықтық лексика мен әдеби нормаланған сөздердің ара-жігін ажыратпай, тілді ғасырлық тоқырауға ұшыратты, деп хабарлайды Zhaiyqmedia ақпарат агенттігі.
Мамандардың пікірінше, стандарттау үдерісінің жүрмеуі – қазақ тілінің дамуына кедергі келтірген негізгі фактор. Бұл жағдай ұлттық деңгейдегі үлкен мәселеге айналған.
«Олар ана тіліне өлтіре соққы беріп, тіл трагедиясын өз қолдарымен жасады. Мұны бүкіл руханияттың ғана емес, ұлттың трагедиясына айналдырды», – делінген сараптамалық материалда.
Негізі, тілдік стандарттау дегеніміз – бір мағынаны білдіретін түрлі тұлғадағы сөздердің ішінен біреуін таңдап алып, оны ресми қолданысқа ұсыну. Себебі әдеби тіл – бұл, ең алдымен, нормаға түскен, яғни жазбаша бекітілген ережелері бар жалпыхалықтық тілдің өңделген бөлігі.
Бұл – әлемдік лингвистикада қалыптасқан тәжірибе. Мысалы, швед лингвисі Торе Янсон стандартты тілдің маңызын былай түсіндіреді:
«Стандарт тіл – мемлекеттік жүйеде, барлық салада… нормаларымен қоғамдық қарым-қатынасқа қызмет ететін тіл. Ол күнделікті қажеттіліктен бөлек, үкімет қызметінде және бұқаралық ақпарат құралдарында қолданылады. Стандарт тіл – мемлекеттің мүддесін қорғайтын тіл».
