Солтүстік Қазақстан облысында жеке тұрғын үйден шыққан өрт салдарынан бес жасар қыз бала көз жұмды. Алдын ала мәлімет бойынша, ересектер пеш жағып, баланы үйге сыртынан құлыптап, қонаққа кеткен, деп хабарлайды Zhaiyqmedia ақпарат агенттігі.
Қайғылы оқиға 18 қаңтар күні кешке Ольшанка ауылында болған. Облыстық Төтенше жағдайлар департаментінің хабарлауынша, өрт сөндірушілер оқиға орнына жеткенде үй толығымен отқа оранып, шатыры опырылып үлгерген.
Жалынды сөндіру кезінде құтқарушылар кәмелетке толмаған баланың денесін тапты.
«Алдын ала болжам бойынша, өрттің шығуына пешті пайдалану кезінде өрт қауіпсіздігі ережелерін бұзу себеп болған», – деп хабарлады ТЖД баспасөз қызметі.
Белгілі болғандай, үйде бес жасар қыз жалғыз қалған. Қазіргі уақытта баланың анасымен психологтар жұмыс істеп жатыр.
Фото: Әлеуметтік желіден
