Қазақстанда медицина саласына жасанды интеллектті енгізу ресми түрде реттелетін болды. Денсаулық сақтау министрлігі осы бағыттағы алғашқы нормативтік құжатты әзірледі, деп хабарлайды Zhaiyqmedia.kz ақпарат агенттігі.
Жаңа құжат жасанды интеллект технологияларын медицинада қолданудың нақты тәртібін белгілейді. Ол диагноз қоюдан бастап емдеу әдістерін таңдауға дейінгі кезеңдерді қамтиды. Мамандардың айтуынша, бұл дәрігерлердің жұмысын жеңілдетіп, қателіктерді азайтады.
«Жасанды интеллект – болашақтың медицинасы. Біз оны қауіпсіз әрі тиімді енгізу үшін барлық жағдайды жасап жатырмыз», – деді министрлік өкілі.
Құжатта жасанды интеллект жүйелерінің деректерді қорғау, жауапкершілік және этика мәселелері де қарастырылған. Алғашқы кезеңде технологияны пилоттық жоба ретінде ірі емханаларда сынақтан өткізу жоспарлануда.
Батыс Қазақстан облысында да жаңа нормативті қолдануға дайындық басталды. Өңірлік денсаулық сақтау басқармасы мамандарды оқыту курстарын ұйымдастырып жатыр.
