Отбасы банкінің салымшылары 2025 жылға арналған мемлекеттік сыйлықақыны 2026 жылдың 1 наурызына дейін алады, деп хабарлайды Zhaiyqmedia ақпарат агенттігі.
Банк өкілдерінің хабарлауынша, ақша аударудың нақты күні әлі белгіленбеген, бірақ төлемдер әдеттегідей ақпан айында жүргізіледі деп жоспарланып отыр.
2025 жылғы сыйлықақының ең жоғары мөлшері 157 280 теңгені құрайды. Бұл соманы алу үшін салымшы депозитті жыл ішінде кемінде 200 АЕК (786 400 теңге) сомасына толтыруы қажет. Ал 2026 жылы бонус мөлшері 173 000 теңгеге дейін өседі. Ол үшін шотты кемінде 865 000 теңгеге толықтыру керек болады.
Сыйлықақы бір салымшының тек бір шотына жылына бір рет қана есептеледі. Сондай-ақ, ол бұрын сыйлықақы төленген сомаға қайта берілмейді.
Мемлекеттік сыйлықақы — бұл азаматтардың тұрғын үй жағдайын жақсарту мақсатында жинақтарын ынталандыру үшін мемлекет тарапынан берілетін жыл сайынғы бонус.
Фото: Әлеуметтік желіден
