Сурет: Ақорда
Мемлекет басшысы жаңа Конституция азаматтардың киберкеңістіктегі дербес деректерін қорғауға кепілдік беретінін атап өтті, деп хабарлайды Zhaiyqmedia.kz ақпарат агенттігі.
Президенттің айтуынша, алда толыққанды цифрлық мемлекет құру міндеті тұр. Ол депутаттарды цифрлық дәуірге жол ашқандар деп атады. Қазақстан жасанды интеллектіні заң тұрғысынан реттейтін дайын үлгі болмаса да, тиімді құқықтық жүйе құруға үлес қосқанын айтты. Жаңа Конституция киберкеңістіктегі дербес деректерді қорғауға кепілдік береді, бұл Цифрлық Қазақстанды құрудың негізгі алғышарты.
Қазақстан Цифрлық кодекс пен «Жасанды интеллект туралы» Заң қабылдаған алғашқы елдердің бірі. Бұл толыққанды цифрлық ел болу үшін инфрақұрылымдық негіз қалыптастыруға мүмкіндік берді.
Мемлекет басшысы еліміз «Үкіметтің жасанды интеллектіге дайындық индексіне» сәйкес Орталық Азияда алдыңғы қатарда тұрғанын атап өтті. Алайда бұл үлкен жолдың басы ғана. Алдағы жұмыстың бағыт-бағдары «Digital Qazaqstan» жалпыұлттық стратегиясында айқындалған. Президент бұл құжатты маусым айының басында бекіткен.
Жасанды интеллектіні экономиканың барлық саласына енгізіп, мемлекеттік басқарудың сапасын жақсарту қажет. Қаңтар айында банк қызметі саласына қатысты жаңа заңдарға қол қойылып, цифрлық қаржы активтерін айналымға енгізудің шарттары айқындалды. Сондай-ақ Реттеу жөніндегі интеллект орталығы құрылып, «e-Government Business» экожүйесі дамытылуда.
Президент цифрлық банктер мен финтех-компаниялар тұтынушылар мен кәсіпкерлерге қолайлы экожүйе құрғанын айтты. Соңғы бес жылда электронды коммерция нарығы сегіз есе ұлғайып, 3,7 триллион теңгеге жетті. Бұл бөлшек сауда көлемінің 15 пайызын құрайды.
Мемлекет инфрақұрылымды үздіксіз дамытуы керек. Қуатты суперкомпьютерлерді іске қосу маңызды қадам болды. «Деректерді өңдеу орталықтарының алқабы» мегажобасы әлемдегі жетекші BigTech-корпорацияларды тартады. Үкімет бұл міндетті ерекше бақылауда ұстауы керек.
