Қазақстанның Ата заңына ауқымды өзгерістер енгізілмек: Негізгі заң мәтінінің 84 пайызын қамтитын 77 бап жаңартылады, деп хабарлайды Zhaiyqmedia ақпарат агенттігі.
Бұл туралы Конституциялық сот төрағасының орынбасары Бақыт Нұрмұханов Конституциялық реформа жөніндегі комиссия мүшелеріне Ата заңға енгізілетін түзетулердің жиынтық жобасын таныстыру кезінде мәлімдеді.
Оның айтуынша, құжатты дайындау барысында азаматтардың, саяси партиялардың, қоғамдық ұйымдар мен сарапшылардың ұсыныстары толық ескерілген.
Жаңартылған Конституция жобасы Преамбуладан, 11 бөлімнен және 104 баптан тұрады. Оған «Халық кеңесі» және «Конституцияға өзгерістер мен толықтырулар енгізу» атты екі жаңа бөлім қосылса, тағы төрт бөлімнің атауы өзгертілген.
Негізгі жаңашылдықтардың қатарында бірпалаталы парламентке көшу, азаматтардың мемлекетті басқаруға қатысуын кеңейту, құқық қорғау тетіктерін күшейту және заң үстемдігін қамтамасыз етуде Конституциялық соттың рөлін арттыру қарастырылған.
Фото: gov.kz
