Батыс Қазақстан облысындағы «Жайық Пресс» ЖШС бас директорының орынбасары лауазымына тәжірибелі журналист Тоқтар Ғабдірешұлы тағайындалды, деп хабарлайды Zhaiyqmedia ақпарат агенттігі.
Жаңа қызметі туралы ол өзінің әлеуметтік желідегі парақшасында жариялады. Оның айтуынша, бұл – ширек ғасырлық еңбегіне артылған зор сенім әрі үлкен жауапкершілік.
«Бүгіннен бастап жергілікті баспасөздің қарашаңырағы – “Жайық Пресс” ЖШС бас директорының орынбасары қызметіне кірістім. Ғұмырымыздың ширек ғасырын БАҚ саласына арнағаннан кейін мұны да бір үлкен сенім, артылған жүк деп қабылдадық. Енді білек сыбанып іске кірісеміз», – деп жазды Тоқтар Ғабдірешұлы.
Тоқтар Ғабдірешұлы – өңірлік журналистикада ұзақ жылдан бері еңбек етіп келе жатқан білікті маман. Ал «Жайық Пресс» серіктестігі – Батыс Қазақстан облысындағы бірнеше аудандық және облыстық басылымдарды біріктіретін ірі медиахолдинг.
Фото: Әлеуметтік желіден
