Сурет: Egemen Qazaqstan
Қазақстандықтар банкомат арқылы қолма-қол ақша алуды бұрынғыдан әлдеқайда аз қолданатын болды. 2026 жылдың бірінші тоқсанында бұл операциялар көлемі 5,8 трлн теңгеге дейін қысқарды, деп хабарлайды Zhaiyqmedia.kz ақпарат агенттігі.
Қаржыгерлер қауымдастығының талдау орталығы жариялаған статистикаға сәйкес, қазақстандықтардың карточкамен төлеуге деген сенімі артып келеді. Қолма-қол ақшасыз операциялар үлесі 85 пайыздан асқан. Бұл — халықтың цифрлық қаржы құралдарына бейімделуінің айқын көрсеткіші.
Сарапшылардың пікірінше, бұл үрдіс еліміздегі қолма-қол ақша айналымын азайтуға және экономиканың ашықтығын арттыруға мүмкіндік береді. Алайда банкоматтардың кейбір шалғай аудандарда әлі де сұранысқа ие екенін айтады.
«Қолма-қол ақшаға деген қажеттілік әлі де бар, әсіресе зейнеткерлер мен ауыл тұрғындары арасында. Дегенмен, жалпы динамика оң. Біз бірте-бірте қолма-қолсыз қоғамға қарай жылжып келеміз», — дейді Қаржыгерлер қауымдастығының өкілі.
Мамандар алдағы уақытта қолма-қол ақшасыз төлемдер үлесінің одан әрі өсетінін болжайды. Бұл ретте банктер мен мемлекеттік органдар цифрлық инфрақұрылымды дамытуды жалғастыруда.
