Сурет: ҰОК
Туризм және спорт министрі Ербол Мырзабосынов Геннадий Головкинді Қазақстанның бренді деп атады, деп хабарлайды Zhaiyqmedia.kz ақпарат агенттігі.
Министр Үкіметте өткен брифингте атақты спортшының Ұлттық Олимпиадалық комитеттің президенті екенін және 2025 жылдың қарашасында World Boxing халықаралық федерациясының басшысы болып сайланғанын айтты. Оның пікірінше, бұл – отандасымыздың әлемдік аренадағы тарихи жетістігі.
«Геннадий Головкин – біздің брендіміз. Халықаралық майданға алғаш рет шығып, аса танымал спорт түрін басқарған тұлға. Біз үшін бұл – үлкен жетістік. Өйткені осыған дейін халықаралық ұйымдарда отандастарымыз халықаралық спорт федерацияларын басқарған емес», деді министр.
Министрдің айтуынша, әлемдік тәжірибеде бір маманның бір мезгілде халықаралық спорт федерациясын және ұлттық олимпиадалық комитетті басқаруы қалыпты жағдай.
