Қазақстандағы ең ірі жаңа кеме Оралда суға түсірілді. Оны «Зенит» зауыты Қорғаныс министрлігінің тапсырысымен жасап шығарды, деп хабарлайды Zhaiyqmedia.kz ақпарат агенттігі.
Кемеге көрнекті мемлекет және қоғам қайраткері Дінмұхамед Қонаевтың есімі берілді. Бұл – елдегі ең ірі кемелердің бірі, оның ұзындығы 100 метрден асады.
Зауыт өкілдерінің айтуынша, кеме заманауи технологиялармен жабдықталған және әскери-теңіз флотының міндеттерін орындауға қабілетті.
«Біз бұл кемені мақтан тұтамыз. Ол Оралдың кеме жасау мектебінің жоғары деңгейін көрсетеді», – деді зауыт басшысы.
Кеменің суға түсірілу салтанатына қорғаныс министрлігінің өкілдері мен ардагерлер қатысты. Жаңа кеме алдағы уақытта Каспий теңізінде қызмет етеді деп жоспарлануда.
