Қырғызстан астанасы Бішкекте жалған доллар өткізумен айналысқан екі қазақстандық сот үкімімен жазасын алды. Олар жергілікті тұрғындарды қылмыстық схемаға тартып, қолдан жасалған шетел валютасын таратқан.
Тергеу деректеріне сүйенсек, Қазақстан азаматтары Е. мен Ж. 2023 жылдың желтоқсанында Бішкекте төрт қырғыз азаматын өздеріне қосып, жалған долларды айналымға шығарған. Олардың әрекеті Қырғызстанның қылмыстық кодексінің бірнеше бабы бойынша сараланды.
Сот отырысында айыпталушылардың кінәсі толық дәлелденді. Оларға 5 жылдан 8 жылға дейін бас бостандығынан айыру жазасы тағайындалды, – делінген Қырғызстан Бас прокуратурасының хабарламасында.
Қазіргі уақытта сотталғандардың Қазақстанға экстрадициялануы мүмкін екендігі айтылуда. Алайда бұл мәселе әлі нақты шешілмеген.
