Қаржы министрлігі Ұлттық банкпен бірлесіп, биыл 4 мамырдан бастап мемлекеттік бағалы қағаздар нарығында бастапқы дилерлер институтын енгізбек. Бұл қадам нарықтың ашықтығы мен тиімділігін арттыруға бағытталған, деп хабарлайды Zhaiyqmedia.kz ақпарат агенттігі.
Бастапқы дилерлер – мемлекеттік бағалы қағаздарды алғашқы нарықта сатып алып, кейін оларды қайта сатуға міндеттенетін уәкілетті ұйымдар. Олар нарыққа қатысушылар үшін сенімді серіктес болады.
Қаржы министрлігінің мәліметінше, жаңа институт мемлекеттік қарызды басқаруды жетілдіріп, инвесторлардың қызығушылығын арттырады. Сондай-ақ бағалы қағаздардың өтімділігі де жоғарылайды деп күтілуде.
«Бұл реформа нарықтық тетіктерді күшейтіп, мемлекеттік бағалы қағаздардың баға белгілеуін айқын етеді. Бастапқы дилерлер нарықтың негізгі ойыншысына айналады», – деді Қаржы министрлігінің өкілі.
Жаңа жүйе 4 мамырдан бастап іске қосылады. Алдымен ірі банктер мен брокерлік компаниялар бастапқы дилер ретінде тіркеледі. Кейін тізім кеңейтілмек.
