Қазақстанда қан тапсыратын донорларға берілетін өтемақы мөлшері соңғы 20 жылда өзгеріссіз қалып, небәрі 983 теңгені (0,25 АЕК) құрап отыр, деп хабарлайды Zhaiyqmedia ақпарат агенттігі.
Мәжіліс депутаты Қарақат Әбден бұл соманың адам ағзасын қалпына келтіруге мүлдем жетпейтінін айтып, дабыл қақты. Оның айтуынша, донор қан тапсырғаннан кейін дұрыс тамақтанып, күшін қалпына келтіруі үшін кемінде 5 мың теңге қажет.
Салыстыру үшін, көрші елдерде донорлардың еңбегі әлдеқайда жоғары бағаланады. Мысалы, Ресейде өтемақы шамамен 9 мың теңгені, ал Беларусьте 6 600 теңгені құрайды. Ал дамыған Еуропа елдері мен АҚШ-та донорларға 27 мыңнан 30 мың теңгеге дейін ақы төленеді.
Осыған байланысты депутаттар өтемақыны 5 406 теңгеге дейін көтеруді ұсынған. Алайда Қаржы министрлігі бұл бастамаға қолдау білдірмеді.
«Бюджет тапшылығына және 2028 жылға дейін мемлекеттік органдардың жаңа бастамаларына енгізілген мораторийге байланысты бұл ұсынысты орындау мүмкін емес», – деп жауап берді ведомство.
Фото: Әлеуметтік желіден
