Жамбыл облысында қаруды абайсыз қолдану салдарынан әскери қызметші мерт болды. Қорғаныс министрлігі мен Қарулы Күштер басшылығы оның отбасы мен жақындарына қайғырып көңіл айтты, деп хабарлайды Zhaiyqmedia ақпарат агенттігі.
Ведомствоның хабарлауынша, марқұмның отбасына барлық қажетті көмек пен жан-жақты қолдау көрсетіледі.
Құрлық әскерлерінің баспасөз қызметі оқиғаға байланысты Ішкі істер министрлігінің әскери-тергеу органдары қылмыстық іс қозғағанын мәлімдеді. Қазіргі уақытта оқиғаның себептері мен мән-жайын анықтау мақсатында соталды тергеу жүріп жатыр.
Қорғаныс министрінің тапсырмасымен оқиға орнына арнайы комиссия жіберілді. Комиссия қайғылы жағдайдың мән-жайын объективті әрі жан-жақты зерделейтін болады.
Комиссияға Қорғаныс министрінің орынбасары генерал-майор Шайх-Хасан Жазықбаев жетекшілік етеді. Жағдайды Қорғаныс министрі жеке бақылауына алды.
«Ведомство оқиғаның толық және ашық тергелуі үшін барлық қажетті шараны қабылдап жатыр», – деп атап өтті ҚР Қарулы Күштері Құрлық әскерлерінің бас қолбасшысы Мереке Күшекбаев.
Фото: Әлеуметтік желіден
