Бүгін, 14 наурыз – қазақ халқы үшін көктемнің алғашқы лебін сездіретін Амал мерекесі немесе Көрісу күні. Бұл – Ұлыстың ұлы күні Наурыздың бастауы саналатын ерекше мейрам, деп хабарлайды Zhaiyqmedia ақпарат агенттігі.
Бұл дәстүр әсіресе еліміздің батыс өңірлерінде – Атырау, Маңғыстау, Батыс Қазақстан және Ақтөбе облыстарында кеңінен сақталған. Көрісудің басты мағынасы – қыстың қаһарынан аман-есен шығып, көктемге аяқ басқан халықтың бір-бірімен қауышып, амандығын білісуі.
Бұл күні жасы кішілер үлкендердің үйіне арнайы барып сәлем береді, ал ағайын-туыс бір-бірімен төс қағыстырып, «Бір жасыңмен!» деп құттықтайды. Бұл тілек адамның тағы бір жылға аяқ басқанын, жаңа жасқа толғанын білдіреді.
Көрісу – тек амандасу емес, сонымен қатар өкпе-ренішті ұмытып, татуласатын, араздықты артқа тастайтын күн. Ол адамдар арасындағы бауырмалдық пен сыйластықты нығайтып, жаңа жылды таза ниетпен бастауға шақырады.
Амал мерекесі құтты болсын!
Фото: Әлеуметтік желіден
