Қазақстанның бірінші ракеткасы Елена Рыбакина Australian Open турнирінде әлемнің екінші ракеткасы Ига Швёнтекті жеңіп, жартылай финалға жолдама алды, деп хабарлайды Zhaiyqmedia ақпарат агенттігі.
Ширек финалдағы кездесу 1 сағат 35 минутқа созылып, 7:5, 6:1 есебімен қазақстандық теннисшінің пайдасына аяқталды. Ойын барысында Рыбакина 10 эйс жасап, 3 қос қателікке бой алдырды және 7 брейк-пойнттың төртеуін сәтті пайдаланды.
Бұл – Рыбакинаның спорттық мансабындағы «Үлкен дулыға» турнирлеріндегі төртінші жартылай финалы. Айта кетерлігі, Елена Аустралия ашық біріншілігінде осы уақытқа дейін бірде-бір сетте қарсыластарына есе жіберген жоқ.
Енді ол жартылай финалда америкалық теннисшілер Джессика Пегула (WTA рейтингінде 6-орын) мен Аманда Анисимова (WTA рейтингінде 4-орын) арасындағы ойынның жеңімпазымен кездеседі.
Сонымен қатар жасөспірімдер арасындағы Australian Open турнирінде тағы бір қазақстандық Заңғар Нұрланұлы да сәтті өнер көрсетуде. Ол 1/8 финалда ресейлік теннисші Савва Рыбкинді 6:1, 6:4 есебімен ұтып, ширек финалға шықты.
Фото: Әлеуметтік желіден
