Мәжіліс депутаты Асхат Аймағамбетов Қазақстанда ұсынылған жаңа саяси реформаларды мемлекеттік жүйені терең әрі кешенді «қайта жүктеу» деп атады, деп хабарлайды Zhaiyqmedia ақпарат агенттігі.
Депутаттың пікірінше, бұл жай ғана атауларды өзгерту емес, билік логикасы мен жұмыс тетігін түбегейлі жаңартуды көздейді. Оның мақсаты – бір адамның еркіне емес, институттардың мызғымастығы мен қоғамның кемелдігіне сүйенетін жүйеге көшу.
Аймағамбетов Сенат пен Мәжілісті біртұтас Құрылтайға біріктірудегі басты мәселе депутаттар санында емес, оның өкілеттігінің салмағында екенін атап өтті. Оның айтуынша, Президенттің Парламентке зор билік беруі – жүйенің тұрақтылығын арттыратын маңызды қадам.
«Конституциялық және Жоғарғы сот судьяларын, Орталық сайлау комиссиясы мен Жоғары аудиторлық палатаның мүшелерін, тіпті Вице-президентті тағайындау құқығын өкілді органға беру – Президенттің Парламентке ұсынған өте ауқымды билігі. Парламентке есеп беретін органдар неғұрлым көп болса, жүйелік қателікке жол беру ықтималдығы соғұрлым азаяды», – дейді депутат.
Сонымен қатар, ол реформалардың негізгі мақсаты – барлық мәселені жеке тұлғаларға тіреп қоятын жүйеден бас тартып, мықты институттарға сенім арту екенін жеткізді. Оның сөзінше, президенттік квоталарсыз, артық қамқорлықсыз жүйе саясаттағы «шығындарды» азайтуы тиіс. Бұл – сенімді жеке тұлғадан институттарға көшіру реформасы.
Вице-президент институтын енгізу және Парламенттің рөлін күшейту тек ішкі аудиторияға ғана емес, инвесторлар мен халықаралық қауымдастыққа да берілген маңызды сигнал болып саналады.
«Жаһандық тұрақсыздық дәуірінде ең құнды капитал – болжамдылық. Біз серіктестерімізге: бізде билік вакуумы болмайтынын, анық иерархия, берік институттар және ашық ережелер бар екенін айқын көрсетеміз», – деп түсіндірді Аймағамбетов.
Депутат кез келген модернизация ұлттық болмысты сақтауды талап ететінін еске салды. Ол Жапония мен Сингапур тәжірибесіне сүйене отырып, табысқа жетудің үш тірегін атады: Заң (тәртіп пен меритократия), Ағарту (сана мен құндылықтар) және жеке тұлғалардан биік тұратын Институттар.
Фото: Әлеуметтік желіден
