Қазақстанда мерзімді әскери қызметте жүрген сарбаздарға несие беруге тыйым салу ұсынылды. Енді банктер мен микроқаржы ұйымдары әскердегі азаматтардың өтінішін қабылдамауға міндеттеледі, деп хабарлайды Zhaiyqmedia ақпарат агенттігі.
Мұндай жаңашылдық Қаржы нарығын реттеу және дамыту агенттігі дайындаған қаулы жобасында көрсетілген. Қазір құжат «Ашық НҚА» порталында жарияланды.
Жобаға сәйкес, Қорғаныс министрлігі мерзімді қызметке шақырылған азаматтар туралы мәліметтерді несие бюроларына жіберіп отырады. Бұл ақпарат азаматтың несиелік есебіне енгізіледі.
Осыдан кейін әскердегі сарбаз несие алуға өтініш берген кезде, банк немесе микроқаржы ұйымы оның мәртебесін алдын ала тексереді. Егер оның мерзімді қызметте екені расталса, несие берілмейді. Аталған құжат 3 ақпанға дейін қоғамдық талқылауда болады.
