Сурет: Өзбекстанның Инвестиция министрлігі
Өзбекстан Грузиядағы Анаклия теңіз портын салу жобасына қатысу мүмкіндігін зерттеп жатыр, деп хабарлайды Zhaiyqmedia.kz ақпарат агенттігі.
Жақында Өзбекстанның Көлік министрі Илхом Махкамов пен Инвестиция, өнеркәсіп және сауда министрі Лазиз Кудратов Грузияның көлік инфрақұрылымымен танысты. Ведомство басшылары Анаклия, Поти және Батуми порттарын аралады.
Ресми мәлімет бойынша, сапар барысында Грузияның Қара теңіз жағалауында салынып жатқан Анаклия теңіз портына ерекше көңіл бөлінді. Құрылыс аяқталған соң ол барлық типтегі кемелерді қабылдай алады.
Өзбек тарапы Грузиядағы ең ірі терең теңіз портын салу жобасына қатысу мүмкіндігіне ерекше назар аударады. Оны «Қытай — Қырғызстан — Өзбекстан» теміржол дәлізімен жалғауға болады,
— делінген Инвестиция министрлігінің хабарламасында.
Сонымен қатар, жақында «Қытай — Қазақстан — Өзбекстан — Ауғанстан» бағытында контейнерлік жүк тасымалы жолға қойылды.
Бұған дейін өзбекстандық сарапшы Мурат Бахадиров түркі елдері өзінің географиялық орналасуын геоэкономикалық артықшылыққа айналдырып жатқанын айтқан еді.
