Сурет: istockphoto.com
Америкалық Life Biosciences компаниясы жасушалардың қартаюын баяулатып, қызметін қалпына келтіруге бағытталған гендік терапияны алғаш рет адамға сынады, деп хабарлайды Zhaiyqmedia.kz ақпарат агенттігі.
ER-100 деп аталатын терапия көздің көру жүйкесіне әсер ететін ауыр ауруларды емдеуге арналған. Ол ашық бұрышты глаукома және көру жүйкесінің нейропатиясы сияқты дерттерден зардап шегетін науқастарға қолданылады. Бұл аурулар уақыт өте келе көру қабілетінің нашарлауына немесе толық жоғалуына әкелуі мүмкін.
Ғалымдардың түсіндіруінше, адам қартайған сайын ДНҚ өзгермейді, бірақ гендердің жұмысын басқаратын жүйелер бұзылады. Соның салдарынан жасушалар өз қызметін бұрынғыдай тиімді атқара алмайды.
Жаңа технологияның мақсаты – жасушалардың жұмысын қайта жандандыру. Ол үшін Oct4, Sox2 және Klf4 деп аталатын арнайы ақуыздар пайдаланылады. Зерттеушілер бұл әдіс жасушалардың қартаю белгілерін азайтып, зақымданған тіндердің қалпына келуіне көмектесуі мүмкін деп есептейді.
Терапия бұған дейін зертханалық жануарлар мен приматтарда сынақтан өткен. Енді адам қатысатын алғашқы клиникалық зерттеу басталып, алғашқы пациент ем қабылдады. Қазіргі кезеңде ғалымдар ең алдымен әдістің қауіпсіздігін тексермек.
Компания өкілдерінің айтуынша, егер сынақтар сәтті өтсе, болашақта бұл технологияны тек көз ауруларын ғана емес, бауыр мен басқа да ағзалардың жасқа байланысты ауруларын емдеуге қолдануға болады.
