Сурет: Фот. Қала әкімдігі
Астанада бесінші рет өткен Astana Half Marathon жарысы 7 000 қатысушыны жинап, шетелдік спортшылар саны бойынша рекорд орнатты, деп хабарлайды Zhaiyqmedia.kz ақпарат агенттігі.
«Бірінші болу – батылдық» корпоративтік қоры ұйымдастырған іс-шараға 243 шетелдік желаяқ қатысты. Олар әлемнің 30-дан астам елінен келген. Ең көп қатысушы Ресейден (91 адам), Өзбекстаннан (28) және АҚШ-тан (17) тіркелген. Сондай-ақ Қытайдан 15, Қырғызстаннан 14, Франциядан 11, Оңтүстік Корея мен Ұлыбританиядан 6-дан, Польша мен Германиядан 5-тен адам қатысты. Жарыс географиясы Азия, Еуропа, Солтүстік және Оңтүстік Америка, Африка, Таяу Шығыс пен Мұхит елдерін қамтыды.
«Мұндай қызығушылықтың себептерінің бірі – ұйымдастыру деңгейінің жоғары болуы. Astana Half Marathon Халықаралық марафондар мен жүгіру жарыстары қауымдастығына (AIMS) кіреді, ал оның бағыттары World Athletics стандарттарына сәйкес сертификатталған. Бұл қашықтықтың дәлдігін және нәтижелердің әділдігін қамтамасыз етеді. Сондықтан көптеген тәжірибелі желаяқ жеке рекордын жаңарту үшін Астанадағы жарысты таңдайды», дейді «Бірінші болу – батылдық» корпоративтік қоры қамқоршылық кеңесінің төрағасы Ғалымжан Есенов.
«Таза Қазақстан» акциясы аясында жарыс бағыты бойында және старт-мәре қалашығында қоқыстарды бөлек жинау орындары мен интерактивті экологиялық аймақтар жұмыс істеді. EcoNetwork-пен серіктестікте жиналған жарамды қоқыс қайта өңдеуге жіберілді. Жарыстың басты экологиялық жаңалығы – PET 1 таңбасы бар, 100 пайыз қайта өңделетін пластиктен жасалған бір реттік стақандар. Олар барлық тамақтану орнында пайдаланылып, жарыс аяқталған соң экологиялық еріктілер қайта өңдеуге жинады. Мұндай тәжірибе Қазақстандағы бұқаралық жүгіру жарыстарында алғаш рет енгізілді.
