Сурет: Egemen Qazaqstan
Мектеп оқушылары жазғы демалыста ресми жұмыс істеп, 100 мың теңгеге дейін табыс табуға мүмкіндігі бар. Бұл 14 жастан асқан азаматтарға арналған, деп хабарлайды Zhaiyqmedia.kz ақпарат агенттігі.
Бос орындар Enbek.kz платформасындағы «Менің жазғы демалысым» бөлімінде жарияланады. Жасөспірімдердің еңбегі арнайы заңдық талаптармен реттеледі. Ата-ананың келісімі міндетті, түнгі уақытта және қауіпті жұмыстарға тыйым салынған.
Еңбекақы мөлшері қоғамдық жұмыстарда 94 мың теңгеден басталса, «Жасыл ел» бағдарламасында 60-150 мың теңге аралығында. Орташа табыс 80-100 мың теңге көлемінде.
Жүйе алгоритмі оқушылардың жас ерекшелігіне бейімделген. Алдымен ата-ана немесе заңды қамқоршы жеке кабинет ашып, тіркеледі. Жүйе интеграция арқылы баланың деректерін автоматты көрсетеді. Бірнеше бала болса, ата-ана қай балаға кабинет ашатынын таңдайды. Тіркеу аяқталған соң кабинет іске қосылады.
Оқушы жүйеге кіріп, түйіндемесін толтырады. Жұмысқа шақыртулар осы кабинетке түседі. Ата-аналар балалардың еңбек үдерісін толық бақылайды. 16-18 жас аралығындағы жасөспірімдер ЭЦҚ арқылы жеке кабинет аша алады.
Жазда жасөспірімдер көбіне дәмхана, сауда, жеткізу қызметі, жарнама тарату, көгалдандыру және маусымдық жұмыстарда еңбек етеді. Бұл тәжірибе жинақтап, еңбек дағдыларын қалыптастыруға, жауапкершілікті түсініп, уақытты тиімді жоспарлауға көмектеседі.
