16 мамыр күні Әбілхан Қастеев атындағы Ұлттық өнер музейінде Халықаралық музейлер күніне орай «Музей түні» акциясы өтті. Бір түннің ішінде мұнда 15 мыңнан астам адам келіп, өнер туындыларын тамашалады, деп хабарлайды Zhaiyqmedia.kz ақпарат агенттігі.
Музей қызметкерлерінің айтуынша, бұл – рекордтық көрсеткіш. Әдетте мұндай шараларға 5–7 мың адам ғана келетін. Биылғы жоғары қызығушылықты ұйымдастырушылар арнайы дайындалған бағдарламамен байланыстырады.
«Біз келушілерге ерекше әсер сыйлауға тырыстық. Экспонаттарды түнгі жарықта көрсетіп, интерактивті аймақтар ұйымдастырдық. Адамдардың көп келуі – біздің еңбегіміздің бағасы», – дейді музей директоры.
Акция аясында келушілерге тегін экскурсиялар, шеберлік сабақтары және концерт ұйымдастырылды. Көпшілік кешкі сағат 18:00-ден бастап таңғы 01:00-ге дейін музейде болды.
«Музей түні» – жыл сайын өтетін дәстүрлі шара. Биылғы акцияға қатысушылар саны өткен жылмен салыстырғанда екі есеге артқан.
