Қазақстанда Халықаралық музей күніне орай дәстүрлі «Музей түні» акциясы өтеді. 16-18 мамыр аралығында еліміздің барлық музейлері келушілерге есігін айқара ашады, деп хабарлайды Zhaiyqmedia.kz ақпарат агенттігі.
Биылғы акция аясында әр өңірдің музейлері ерекше бағдарлама дайындап жатыр. Келушілерді тарихи мұра, өнер туындылары және заманауи технологиялармен таныстыратын интерактивті көрмелер күтеді.
«Біздің мақсат – халықты музейге тарту, тарихқа деген қызығушылықты арттыру. Үш күн бойы әрбір адам тегін кіріп, көрмелерді тамашалай алады», – дейді ұйымдастырушылар.
Орал қаласының музейлері де осы шараға белсенді қатысады. Жайық өңірінің бай тарихы мен мәдениетін насихаттайтын арнайы экспозициялар ұйымдастырылмақ. Сонымен қатар, балалар мен жастарға арналған шеберлік сабақтары, викториналар өтеді.
«Музей түні» акциясы жыл сайын өткізіліп, жұртшылықтың үлкен қызығушылығына ие болып келеді. Биыл да көптеген адамды тарих әлеміне саяхат жасауға шақырады.
