АҚШ Қорғаныс министрлігі Украина мен Газадағы қақтығыстарға байланысты азайған қару-жарақ қорын шұғыл толтыру үшін елдің қорғаныс өнеркәсібін жедел жұмыс режиміне көшірді, деп хабарлайды Zhaiyqmedia ақпарат агенттігі.
Пентагон аса маңызды қару-жарақ түрлерін шығаруды жеделдету мақсатында Lockheed Martin, BAE Systems және Honeywell секілді ірі корпорациялармен ауқымды келісімшарттар жасасты. Басты мақсат – сарқылған арсеналды толықтырып, кез келген ықтимал қарсыластан технологиялық тұрғыдан басымдықты сақтап қалу.
Жаңа келісімдер аясында THAAD әуе шабуылына қарсы қорғаныс жүйелеріне арналған өздігінен бағытталатын оқтұмсықтар өндірісі бірден төрт есеге артады. Сонымен қатар жоғары дәлдіктегі зымырандар, навигация жүйелері және радиоэлектрондық күрес құралдарын шығару да жеделдетіледі.
«Біз өнеркәсіпке ұзақ мерзімді сұраныс бар екенін білдіріп, нақты сигнал беріп отырмыз. Бұл компанияларға өндіріс қуатын кеңейтуге және жаңа мамандар тартуға сенімді түрде инвестиция салуға мүмкіндік береді», — деді Пентагон басшысының орынбасары Майкл Даффи.
Қорғаныс министрлігінің мәлімдеуінше, АҚШ-тың жаңартылған өнеркәсіптік базасы енді елге және оның одақтастарына төнетін кез келген қауіптен басым түсуге қауқарлы.
Фото: Әлеуметтік желіден
