Қазақстанда дүкендерде бір тауардың екі түрлі бағасы көрсетілетін жүйе заңдастырылуы ықтимал. Жаңа ережеге сәйкес, қолма-қол төлем жасағанда бір баға, ал бөліп төлеу кезінде басқа баға көрсетіледі. Бұл бастама «рассрочка» шын мәнінде несие екенін ашық көрсетуге бағытталған.
Жаңа жүйе қабылданса, бөліп төлеу алғаш рет заң жүзінде бекітіледі. Бұл тұтынушылардың құқығын қорғауды күшейтеді. Енді бөліп төлеумен алынған тауар да ұнамаған жағдайда қайтаруға жатады.
Қазір қосарланған баға жүйесі жоқ. Сарапшылардың айтуынша, ірі компаниялар банктің 15-20% үстемесін өз есебінен жапса, шағын бизнес бұл шығынды көбіне тұтынушыға артады немесе банк комиссиясын көтеруге мәжбүр.
Жаңа ережеге қатысты соңғы шешім биылдың соңына дейін қабылданбақ. Егер құжат бекітілсе, қазақстандықтар тауардың нақты құнын біліп, саналы түрде таңдау жасай алады.
