Орал қаласының әкімі Мұрат Байменов тұрғындарды ауыз сумен және кәріз жүйесімен қамту бағытында соңғы жылдары жүзеге асқан маңызды жобалар туралы мәлімдеді.

Әкімнің айтуынша, қалада бұған дейінгі барлық 22 су жинау ұңғымасы толық қалпына келтіріліп, жаңа 22 тереңдік сорғы орнатылған. Соның нәтижесінде өндірілетін су көлемі соңғы бес жылмен салыстырғанда тәулігіне 19 мың текше метрге артқан. Бұл — қаладағы ауыз су тапшылығын едәуір азайтып, тұрғындарды тұрақты сумен қамтуға мүмкіндік беріп отыр.

Биыл жалпы құны 12,1 миллиард теңге болатын екі ірі су жинау станциясын реконструкциялау жұмыстары қолға алынған. Аталған жобалар жүзеге асқанда, Жұлдыз, Ескі әуежай және 10, 7, 6, 5, 4-шағын аудандар үздіксіз ауыз сумен қамтамасыз етілетін болады. Бұған қоса, тағы бес су ұңғымасын салуға арналған жобалық-сметалық құжаттар дайындалған.

Инженерлік инфрақұрылымды жаңарту бағытында да бірқатар ілгерілеу бар. Өткен жылы 4,6 миллиард теңгеге №2 және №3 кәріз-сорғы станциялары жаңартылған. Ал биыл Ақжайық шағын ауданында жаңа кәріз-сорғы станциясы пайдалануға берілді.

Қазір 2 миллиард теңгеге №18А кәріз-сорғы станциясын қайта жаңғырту жұмыстары жүріп жатыр. 2026 жылы тағы екі нысан — №1 және №29 станцияларын жаңартуға 4,1 миллиард теңге бөлу жоспарланған.

Мұрат Байменовтың айтуынша, бұл жобалар толық іске асқанда, сумен жабдықтау желілерінің тозу деңгейі 55 пайыздан 52 пайызға дейін төмендейді.

Орал қаласы соңғы жылдары ауыз су және кәріз инфрақұрылымын жаңғырту бағытында аймақ бойынша алдыңғы қатарда тұр.