Атырау қаласының Геолог шағын ауданында тұрғындар көптен күткен жаңа саябақтың құрылысы басталды. Бұл жоба жергілікті халықтың тыныс-тіршілігіне серпін беріп, жасыл аймақтардың көбеюіне үлкен үлес қоспақ.
Қазіргі таңда саябақ аумағында 6 жылдық 74 түп қарағайдың арнайы сорты және 230 түп шаған (ясень) ағашы отырғызылып жатыр. Бұл – Атырауда бұрыннан кеңінен егілмеген ерекше ағаш түрлері. Қарағай мен шаған ағаштарының экологиялық пайдасы зор: олар ауаны тазартумен қатар, жаздың ыстығында табиғи салқындық беріп, тұрғындарға жайлы микроклимат қалыптастырады.
Жобаны жүзеге асырушылардың айтуынша, саябақта тек ағаш отырғызумен шектелмей, заманауи инфрақұрылым да қарастырылған. Мұнда тұрғындардың серуендеуіне арналған жаяу жүргіншілер жолы, балалар ойын алаңдары, спортпен шұғылданатын арнайы аймақтар салынады. Сондай-ақ саябақта жарық шамдары орнатылып, демалушылар үшін орындықтар қойылады.
Жаңа демалыс орны халықтың салауатты өмір салтын ұстануына, балалардың бос уақытын тиімді өткізуіне және қала экологиясын жақсартуға ықпал етеді. Тұрғындар бұл саябақтың тек тынығатын жер ғана емес, қауымдастықты біріктіретін қоғамдық кеңістікке айналатынына сенімді.
Атырау қаласы үшін мұндай жасыл жобалар ауа райының қолайсыздығына қарсы күрестің маңызды бөлігі саналады. Өйткені жаз мезгілінде аптап ыстық жиі қайталанатын өңірде көлеңке мен жасыл желектің маңызы айрықша.
