Ауылдық аумақтарды дамытуға серпін беретін «Қаладан – ауылға» өңірлік жобасы Казталов ауданында жүйелі түрде жүзеге асырылып келеді. Бұл бастама Батыс Қазақстан облысында 2023–2027 жылдарға арналған ауылдық аумақтарды дамыту тұжырымдамасы аясында қолға алынып, нақты нәтижелерін көрсетуде. Жобаға қатысуға ниет білдірушілердің қатары күн сайын артып отыр. Олардың ішінде ел игілігі үшін қызмет етуді мақсат еткен білім және денсаулық сақтау саласының жас мамандары бар.

31 тамыз күні Казталов ауданында «Қаладан – ауылға» бағдарламасы бойынша қоныстанған 4 отбасы баспаналы болды. Алдымен Қараөзен ауылында жоба аясында қоныс аударған екі ұстазға жаңа тұрғын үйдің кілті табыс етілді. Салтанатты рәсімге аудан әкімі Асланбек Сарқұлов қатысып, жас мамандарға игі тілегін жеткізді.

— Өткен жылы Казталов ауданына 19 отбасы, яғни 106 адам қоныс аударып, жаңа өмірге қадам басты. Ал биылғы жылы 4 дәрігер отбасымен көшіп келіп, баспаналы болды. Қазіргі таңда бағдарламаға 19 ауыл енгізіліп, соның ішінде 12 ауылға 24 отбасы, 129 адамның көшіп келу ниеті бар. Бұл – ауылдық елді мекендердің әлеуетін арттырып, олардың жаңаруына тың серпін беретін игі бастамалардың жемісі. Жобаға қатысушы әрбір азамат жаңа ортаға бейімделіп, кәсібін дөңгелетіп, ел дамуына үлес қосады деп сенеміз. Бұл – туған жерге жанашырлық пен еңбекке адалдықтың айқын көрінісі, — деді аудан әкімі Асланбек Ахметоллаұлы.

Мемлекет басшысы Қасым-Жомарт Кемелұлы Тоқаев биылғы Тамыз конференциясында: «Біз өркениетті ел боламыз десек, ұстаздарға барынша жағдай жасауымыз керек», — деп атап өтіп, Үкіметке нақты тапсырмалар берген болатын. Бүгін ұстаздардың баспаналы болуы – сол міндеттердің орындалуының жарқын көрінісі. Жаңа қоныс иелері де өз ризашылығын білдірді.

«Қаладан – ауылға» жобасы арқылы ауданға қоныстанып жатқан әрбір отбасы ауылдың әлеуметтік-экономикалық дамуына серпін беріп қана қоймай, ауылдық жерлерде жаңа мүмкіндіктердің ашылуына жол сілтеуде. Жоба жалғасын таба отырып, алдағы уақытта да жас мамандарды тартуға, оларға қолайлы жағдай жасауға және ауылдық аймақтардың өркендеуіне ықпал етпек.