Қазақстандық шахматшы, блицтен үш дүркін әлем чемпионы Бибісара Асаубаева классикалық шахматтан бұрынғы әлем чемпионы Александра Костенюкті фристайл-шахмат бәсекесінде жеңіп кетті, деп хабарлайды Zhaiyqmedia ақпарат агенттігі.
Германияда фристайл-шахматтан (Фишер шахматы) ерлер арасында әлем чемпионаты өтті. Осы турнир аясында Асаубаева мен Костенюк арасында арнайы көрсетілім матчы ұйымдастырылды. Төрт партиядан тұрған кездесу 2,5:1,5 есебімен отандасымыздың пайдасына шешілді.
Бұл жеңіс Бибісара Асаубаеваға 2027 жылы өтетін фристайл-шахматтан әйелдер арасындағы алғашқы әлем чемпионатына жолдаманы кепілдендірді.
«Жеңіске жету әрқашан жағымды. Әсіресе, бұл жеңіс келесі әлем чемпионатына қатысуға мүмкіндік берсе, тіпті керемет», – деді қазақстандық шахматшы.
Фристайл-шахматты XX ғасырдың 90-жылдары әлем чемпионы Бобби Фишер ойлап тапқан. Оның кәдімгі шахматтан басты айырмашылығы – пешкалардан басқа фигуралар әр партияның алдында 960 ықтимал нұсқаның бірі бойынша кездейсоқ орналастырылады. Сондықтан бұл ойын түрі теориялық дайындықтан гөрі, комбинациялық қабілетті көбірек талап етеді.
Айта кетейік, ерлер арасындағы турнирде норвегиялық Магнус Карлсен чемпион атанды.
Фото: Freestyle-chess.com
